Lán Vegagerðarinnar greidd með vegtollum

Heildarlán Vegagerðarinnar fyrir vegaframkvæmdum sem sett verða í forgang verða borguð með veggjöldum. Frá þessu greinir Sigurður Ingi Jóhannsson, samgöngu- og sveitarstjórnarráðherra, í samtali við RÚV. Heildarlánið verður minnst 50 til 60 milljarðar króna og stefnt er að því að þau verði borguð að loknum verktíma sem yrði í fyrsta lagi 2024.

Sigurður Ingi segir í samtali við RÚV að þær framkvæmdir sem hann sjái fyrir sér að fái forgang verði á leiðum inn og út af höfuðborgarsvæðinu, svo sem Reykjanesbraut, Suðurlandsvegur og Vesturlandsvegur inn í borgina.

Af­greiðslu sam­göngu­áætlun­ar til næstu fimm ára og lengri tíma hef­ur verið frestað til 1. fe­brú­ar á næsta ári. Þings­álykt­un­ar­til­lög­ur sam­gönguráðherra um áætlunina hafa verið til um­fjöll­un­ar í um­hverf­is- og sam­göngu­nefnd þings­ins frá því í lok sept­em­ber. Málið hef­ur tekið þá stefnu á þess­um tíma að stuðning­ur hef­ur vaxið við hug­mynd­ir um flýt­ingu vega­fram­kvæmda með lán­töku og inn­heimtu veggjalda.

Til stendur að ríkisstjórnin fái heimild til að stofna félag í þeim tilgangi að safna fé að tilteknum framkvæmdum hringinn í kringum landið. Áherslan verði þó mest á leiðum umhverfis höfuðborgina, að sögn Sigurðar Inga. Fénu verður safnað saman í sjóð sem á helst að vera í vörslu Vegagerðarinnar og fé úr sjóðnum á eingöngu að fara í þessar tilteknu framkvæmdir. Tilgangurinn er að hafa fjármögnunina eins ódýra og skilvirka og hægt er, að sögn ráðherra.

Ekki hefur verið útfært hverjir muni veita lánin til framkvæmdanna.

• 2 blogg um fréttina

Bloggað um fréttina

• Gunnar Heiðarsson: Að eyða lottovinningnum áður en dregið er
• Sigurður Antonsson: Fjármálakapall framtíðar. Óútfylltur víxill