„Líkamsklukkurofinn“ fundinn

Vísindamenn segja að þeir hafi fundið efnafræðilegan rofa sem stjórnar hinu erfðafræðilega gangverki sem aftur stýrir líkamsklukkunni, sem er innbyggð í alla einstaklinga.

Þeir segja að þrátt fyrir að um flókið genafræðilegt ferli sé að ræða þá sé það í raun aðeins ein amínósýra, sem er grunneining próteins, sem stjórnar ferlinu. Þetta kemur fram á fréttavef breska ríkisútvarpsins.

Vonast er til þess að niðurstöðurnar leiði til þess að m.a. verði hægt að búa til betri svefnlyf .

Háskólinn í Kaliforníu hefur birt rannsókn sína í vísindaritinu Nature.

Paolo Sassone-Corsi, sem fór fyrir rannsókninni, segir að þar sem um svo nákvæma rofavirkni sé að ræða þá virðist sem svo að hún hafi áhrif á  efnasambönd sem aftur geti stjórnað svefnvenjum fólks.

„Það er ávallt ótrúlegt að fylgjast með því hversu nákvæm stjórn sameinda er í líffræði,“ segir hann.

Líkamsklukkan mannsins er afar næm og getur séð fyrir ýmsar breytingar sem verða í umhverfinu. Hún sér um að stjórna mikið af þeirri starfssemi sem á sér stað í líkama fólks, t.d. svefnmynstri þess, efnaskiptum og hegðun.

Talið er að klukkan stýri um 15% af öllum genum líkamans.

Það getur því haft mikil áhrif á heilsu manna verði klukkan fyrir truflun. Svefnleysi, þunglyndi, hjartasjúkdómar, krabbamein og  taugahrörnun er á meðal þess sem er sagt tengjast þessari truflun.

• 2 blogg um fréttina

Bloggað um fréttina

• Steinn Hafliðason: Ætli ég geti lagst í híði yfir veturinn?
• Arnar Pálsson: Dægurklukkan og ritstuldur morgunblaðsins