Skroppið í göngu um geiminn

Tveir geimfarar úr bandarísku geimferjunni Endeavour hafa lokið við fyrstu af fimm geimgöngum sínum sem skipulagðar eru á meðan þeir dvelja í Alþjóðlegu geimstöðinni, samkvæmt upplýsingum frá NASA, bandarísku  geimferðastofnuninni.

Tim Kopra, sem var í sinni fyrstu geimgöngu og Dave Wolf, gamalreyndur geimfari, komu aftur í Alþjóðlegu geimstöðina í gærkvöldi klukkan 21:51 að íslenskum tíma, 37 mínútum á undan áætlun. Voru þeir rúma fimm tíma á göngu í geimnum.

Aldrei hafa jafnmargir geimfarar verið samankomnir í einu á sporbaug. Alls voru þrettán manns í geimstöðinni, þegar sjö manna áhöfn skutlunnar bættist við sex manna starfslið stöðvarinnar á föstudag.

Áhöfnin ferjaði með sér það sem á vantaði upp á að hægt væri að ljúka gerð tilraunastofu frá Japan, varahluti og mat. Er gert ráð fyrir að heimsóknin var í ellefu daga. Endeavour var skotið á loft á miðvikudagskvöldið eftir að geimskotinu hafði verið frestað fimm sinnum dagana á undan.

• 2 blogg um fréttina

Bloggað um fréttina

• Jón Páll Ásgeirsson: Geimganga
• Gísli Foster Hjartarson: Skotist eftir mynd!!!!!