Grænmetisætur fá síður hjartasjúkdóma

Rannsókn sem 44 þúsund Englendingar og Skotar tóku þátt í sýnir að grænmetisætur eru í 32% minni hættu á að deyja á sjúkrahúsi af völdum hjartasjúkdóma.

Kólesterólmagn, blóðþrýstingur og líkamsþyngd eru talin vega þungt hvað þetta varðar.

Niðurstöður rannsóknarinnar hafa verið birtar í American Journal of Clinical Nutrition, og greint er frá þeim í frétt á vef BBC.

Hjartasjúkdómar eru mikið heilsufarsvandamál á Vesturlöndum. Þeir draga 94 þúsund Breta til dauða á hverju ári, fleiri en nokkur annar sjúkdómur. 2,6 milljónir Breta þjást af hjartasjúkdómum.

Vísindamenn við Oxford-háskóla hafa greint gögn 15.100 grænmetisæta og 29.400 manna sem borða kjöt og fisk.

Á 11 árum létust 169 þátttakendur rannsóknarinnar vegna hjartasjúkdóma og 1.066 þurftu meðferð á sjúkrahúsi. Þetta fólk var líklegra til að borða kjöt og fisk.

Vísindamennirnir segja að niðurstöðurnar sýni fyrst og fremst hversu miklu hlutverki mataræði gegnir þegar kemur að hjartasjúkdómum.

• 1 blogg um fréttina

Bloggað um fréttina

• Mofi: Bókin 80-10-10