LIGO-rannsóknastofnunin tilkynnti í gær að hún hefði greint þyngdarbylgjur frá samruna tveggja svarthola, fyrir meira en einum milljarði ára, í annað sinn.
Spáð var fyrir um tilveru og áhrif þyngdaraflsbylgjanna sem teygja tíma og rúm í afstæðiskenningu Einsteins en tæknin til þess að mæla áhrif þeirra hefur aðeins nýlega verið þróuð. Mælingarnar fylgja nær alveg útreikningum Einstein.
Er uppgötvunin talin hafa mikla þýðingu fyrir rannsóknir á upphafi alheimsins og staðallíkan eðlisfræðinnar.
LIGO-nemarnir í Louisiana og Washington í Bandaríkjunum námu þyngdarbylgjurnar á annan í jólum í fyrra. Bylgjurnar komu frá tveimur svartholum, öðru sem er fjórtán sinnum massameira en sólin en hitt er átta sinnum massameira. Bylgjurnar runnu saman í eitt svartholt sem er 21 sinnum massameira en sólin. Gerðist það fyrir 1,4 milljörðum ára, að sögn vísindamanna.
Síðustu sekúnduna fyrir samrunann snerust svartholin 55 sinnum um hvort um annað.
Við samrunann losnaði jafnmikil orka og er í allri sólinni okkar, að því er segir í frétt The Guardian.
John Veitch, stjarneðlisfræðingur í LIGO-teyminu, segir að uppgötvunin staðfesti að til séu fjölmörg svarthol sem enn eigi eftir að finna.
Rannsóknastofnunin tilkynnti í febrúar að hún hefði greint þyngdaraflsbylgjur frá samruna tveggja svarthola í fyrsta sinn.
LIGO-rannsóknastofnunin, Laser Interferometer Gravitational Wave Observatory, var sett á stofn árið 1992 í þeim tilgangi að reyna að greina þyngdaraflsbylgjur. Greiningarstöðvar hennar eru í Washington-ríki og Louisiana.
Frétt mbl.is: Þyngdaraflsbylgjur greindar í fyrsta sinn