Tengsl milli bakflæðislyfja og astma

Börn kvenna sem taka lyf við vélindabakflæði á meðgöngu eru þriðjungi líklegri til að þjást af astma en önnur börn. Rannsakendur segja þó óljóst hvort það eru lyfin sjálf eða eitthvað annað sem veldur.

Niðurstöðurnar birtust í tímaritinu Journal of Allergy and Clinical Immunology en höfundar rannsóknarinnar ítreka að frekari rannsókna sé þörf til að kanna hvað veldur tengslunum milli lyfjanotkunar mæðranna og aukinna líkna á astma hjá börnunum.

Vélindabakflæði, sem lýsir sér þannig að innihald magans rennur upp í vélindað, veldur brjóstsviða og er algengt meðal óléttra kvenna vegna hormónabreytinga og þrýstings á magann.

Hægt er að koma í veg fyrir bakflæðið með lyfjum, en þau hafa löngum verið talin hættulaus börnum í móðurkviði.

Vísindamenn frá Skotlandi og Finnlandi fóru yfir átta eldri rannsóknir og komust að því að börn kvenna sem tóku bakflæðislyf á meðgöngu voru þriðjungi líklegri til að hafa heimsótt lækna vegna astma-einkenna.

Astmi er krónískur lungnasjúkdómur sem veldur bólgum og samdrætti í öndunarveginum. Hann kemur oft fram á barnsaldri.

Sem fyrr segir segja vísindamennirnir að frekari rannsókna sé þörf og það kunni að vera að það sé vélindabakflæðið sjálft sem sé orsakavaldurinn, frekar en lyfin.

• Blogga um frétt