Veiði | mbl | 29.7.2023 | 22:34

Sá stærsti á Suðurlandi í sumar

Theódór með laxinn stóra úr Ytri-Rangá. Hann var ekki nema sjö mínútur að landa honum. Enda með öflugan taum. Ljósmynd/Dagur Árni

Það varð uppi fótur og fit hjá Theódór Friðjónssyni og leiðsögumanninum hans, Degi Árna Guðmundssyni þegar sá síðarnefndi háfaði lax sem Theódór var búinn að slást við í sjö mínútur.

Veiðimaðurinn lýsti því yfir að þetta væri allavega níutíu sentímetra fiskur. „Vá maður, Vá,“ öskraði Dagur Árni þegar hann sá fiskinn. „Hann er stærri en það,“ sagði hann í sömu tónhæð.

Þeir félagar mældu fiskinn og tóku vídeó af þeirri mælingu sem þeir sendu Sporðaköstum. Góður siður og til þess fallin að draga úr efasemdaröddum. Þessi tröllslegi hængur mældist 101 sentímetri og er sá stærsti sem Sporðaköst hafa heyrt um í sumar. Veiðistaðurinn var Kerið í Ytri–Rangá. Ekki þekktasti staðurinn og í raun er þessi risalax fyrsti laxinn sem veiðist í Kerinu í sumar.

Hængur, 101 sentímetri. Þeir eru ekki margir hundraðkallarnir sem hafa veiðst í sumar. Ljósmynd/Dagur Árni

„Ég var í sjö mínútur með hann eins og hundraðkallinn sem ég fékk í Miðfirðinum í fyrra og þú sagðir frá í Sporðaköstum,“ svaraði Theódór þegar hann var spurður um hversu lengi viðureignin hefði staðið.

Theódór fékk einmitt hundrað sentímetra fisk í Miðfjarðará í fyrra og var þá með honum Helgi Guðbjörnsson leiðsögumaður. Að þessu sinni var það Dagur Árni og sendu þeir eins og fyrr segir myndband af mælingunni þar sem sést vel að hann mælist 101 sentímetri.

Þetta er fyrsti laxinn sem veiðist í Kerinu í sumar. Viðbúið að þessi staður verði barinn mikið á næstunni. Ljósmynd/Dagur Árni

„Hann tók rauðan Frigga. Ég nota Frigga mikið en iðulega litlu útgáfurnar nema í Rangánum þá fer ég í þessa stóru og það virkaði nú heldur betur í þetta skipti,“ sagði glaðhlakkalegur veiðimaður sem tvö ár í röð hefur landað hundraðkalli.

Laxinn sem Theódór landaði er sá stærsti sem veiðst hefur á Suðurlandi til þessa í sumar.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
101 cm	Vatnsdalsá	Erlendur veiðimaður	29. september 29.9.
101 cm	Eystri-Rangá	Grzegorz Loszewski	27. september 27.9.
105 cm	Hvítá við Iðu	Katrín Tanja Davíðsdóttir	24. september 24.9.
101 cm	Víðidalsá	Jón Eðvald Halldórsson	22. september 22.9.
107 cm	Grímsá	Jón Jónsson	22. september 22.9.
101 cm	Miðfjarðará	Agnar Sigurjónsson	22. september 22.9.
101 cm	Hvítá við Iðu	Gunnar Pétursson	20. september 20.9.