Guðborg Hera Guðjónsdóttir

Þá er elsku Hera-amma gengin á braut og skilur eftir sig góðar og hugljúfar minningar. Við tengslabörnin viljum þakka þér allan þann hlýhug og vináttu sem þú ávallt sýndir okkur, allt frá fyrstu stundu. Þú varst ætíð lífsglöð og félagslynd, upptekin af ættfræði og eins og uppflettibók um ættir innfæddra Hafnfirðinga langt aftur í kynslóðir. Það duldist engum að þér var annt um þína nánustu, fylgdist vel með öllum hópnum og vissir fátt skemmtilegra en að hitta og spjalla við slektið á góðri stundu. Þú varst með ólæknandi áhuga á spilamennsku og vonandi siturðu nú til borðs með gengnum bridsspilurum og nýtur lífsins á nýjum stað.

Kæra Hera-amma. Við viljum að þínu lífsverki loknu þakka fyrir allar góðu stundirnar sem við áttum saman og biðjum góðan Guð um að umlykja og styrkja elsku Helga-afa á erfiðri stundu.

Elsku Helgi-afi, Helga, Elfar og fjölskyldur. Hugurinn er hjá ykkur og við vottum ykkur dýpstu samúð. Blessuð sé minning Heru-ömmu.

Elsku amma mín.

Ég trúi ekki að þú sért farin frá mér. Það er svo margt sem ég á eftir að sakna, eins og t.d. að grípa í spil, rölta um Smáralindina og tala við þig um allt og ekkert.  Alltaf mundir þú eftir afmælisdögum okkar Valgeirs og hringdir þá í okkur, en alltaf varstu tilbúin með pening handa Svandísi Dagmar og Sævari Orra til að ég gæti farið og keypt eitthvað fallegt handa þeim. Þú varst búin að biðja mömmu um að láta Sævar Orra fá pening í afmælisgjöf núna síðast en ekki gat hann þakkað þér fyrir hana þar sem þú lést tveimur dögum fyrir afmælið hans. Ég er búin að kaupa nytsamlega gjöf handa honum og vil ég því þakka þér fyrir hana.

Elsku afi, mamma og Elfar, megi Guð styrkja ykkur í gegnum þessa miklu sorg.

Takk fyrir allt elsku amma mín.

Ég elska þig.

Þín,

Elsku Hera amma mín.

Ég sakna þín alveg rosalega mikið. Ég var í Vestmannaeyjum þegar þú lést og mér fannst leiðinlegt að geta ekki verið hjá þér. En ég kvaddi þig áður en ég fór og það er gott. Mér fannst alltaf svo gaman að spila við þig og þegar ég spurði þig um að spila þá sagði þú alltaf já. Þú gleymdir aldrei afmælinu mínu og gafst mér alltaf pening svo að mamma og pabbi gætu keypt eitthvað fallegt handa mér. Ég er búin að hugsa vel um Helga afa og ætla alltaf að gera það. Þér líður betur núna og ég veit að  Rúnar afi tekur vel á móti þér og þið eruð örugglega að spila núna og fylgjast með okkur hinum.

Elsku Helgi afi og Helga amma, ég vona að Guð hjálpi okkur í gegnum þessa erfiðu tíma.

Hvíldu þig nú elsku Hera amma mín.

Ég elska þig og sakna þín.

Þín,

Elsku mamma mín.

Ekki átti ég von á því að þú yrðir tekin svona fljótt frá mér. Veikindi þín báru svo brátt að. Mér finnst ég eiga eftir að segja þér svo margt ,sem er bara á milli okkar. Söknuðurinn minn er mikill, símtölin á hverju kvöldi, bíltúrarnir um helgar og allar okkar samverustundir. Eins veistu að þú og pabbi voruð mín stoð og stytta eftir að Rúnar lést og ég varð ein.

Elsku pabbi minn og Elfar bróðir, þetta eru þung spor og missir okkar allra er mikill en við eigum bjartar minningar um mömmu og þær munu lýsa okkur um ókomin ár.

Elsku mamma mín, ég elska þig og sakna.

Ég mun ávallt hugsa vel um pabba fyrir þig.

Þín dóttir,