Aníta er Sauðkrækingur í báða leggi og hefur gert garðinn frægan hér á landi sem erlendis. Hún var yfirkokkur á Borginni en heldur nú um stjórnartaumana í Víkinni – Sjóminjasafni en þar stendur til að opna glæsilegt nýtt eldhús með vorinu. Þar fyrir utan elskar Aníta að ferðast og hefur unnið á yfir tuttugu heimsfrægum stöðum í Bandaríkjunum en hún segist vera mikill aðdáandi matarsenunnar í Bandaríkjunum. Nú síðast dvaldi hún á Bahama-eyjum þar sem hún upplifði mikil ævintýri en hún segir að það hafi verið frábært. Bæði hvað varðar mat og svo hafi hún smellpassað inn í kúltúrinn þar syðra.

„Það var bara eitthvað, get svo sem ekki lýst því en ég fann mig rosalega vel þarna úti og fannst þetta eitt ævintýri út í gegn. Ég var á staðnum hans Völla Snæs þarna úti sem heitir Sabor og er á einu besta hótelinu þarna úti. Þetta er algjör paradís, það verður ekki annað sagt,“ segir Aníta sem var í öruggum höndum Emmanuels Smith sem sér um rekstur staðarins og er mikill Íslandsvinur. „Við hittumst fyrst hér á landi og hann hefur sent fólk frá sér hingað til okkar í þjálfun. Ég brann í skinninu að prófa þetta og ég verð bara að segja að þetta var frábært.“

Var virkilega smeyk

Aníta lenti í ýmsum ævintýrum svo að ekki sé meira sagt og sjálfsagt var hápunkturinn fellibylurinn Matthew. „Það var svakalegt. Eyjan fór bara í rúst. Ég get ekkert orðað það neitt örðuvísi. Maður átti bara fótum sínum fjör að launa, eða þannig. Ég var á hótelinu í nokkuð góðum höndum en ég viðurkenni að það komu stundir þar sem ég var virkilega smeyk. Eyjan fór mjög illa út úr þessu og maður var í áfalli að ganga um og skoða skemmdirnar með eigin augum. Tré og byggingar horfnar, allt brotið og bramlað og margt fólk sem missti heimili sín. Við vorum eini veitingastaðurinn sem hægt var að opna nánast strax eftir fellibylinn. Það var því brjálað að gera en hótelið fylltist af erlendu fólki sem kom til að laga til á eynni. Þá ekki verkamenn heldur sérfræðingar af ýmsum toga sem komu alls staðar að úr heiminum.“

Ekki beint umhverfisvænir

Aðspurð segist Aníta hafa verið hrifin af bahamískri matargerð þótt hún hafi verið fullmikið djúpsteikt fyrir hennar smekk. „Það er bókstaflega allt djúpsteikt sem er alveg fínt en því má redda með ferskum fiski því fiskurinn þarna er æðislegur og ætli það hafi ekki verið mesti skólinn fyrir mig. Allar þessar nýju fisktegundir sem ég hafði aldrei unnið með áður. Svo er það uppáhaldið mitt: conch-fiskur. Það er fiskur úr stórri og óskaplega fallegri skel sem þeir ofveiða grimmilega og nota með öllum mat. Það verður seint sagt um Bahama-búa, þrátt fyrir að þeir séu frábærir, að þeir séu beint framarlega í umhverfismálum og ofveiði á einni sjávartegund er ekki mikið stórmál í þeirra augum. En conch-fiskurinn er góður og ég ákvað einmitt að gera smátilraun með hann hér og bjóða upp á tilbrigði við þjóðarrétt þeirra Bahama-búa sem er conch-fritters sem eru eiginlega bara djúpsteiktar conch-bollur. Ég setti þorsk í staðinn og þetta smakkaðist hrikalega vel, segir Aníta og gefur blaðamanni og ljósmyndara að smakka. Við tökum heilshugar undir það. Alvöru huggunarmatur sem veitir vellíðan. Úti er hálfgerður suddi og þetta er allt svo afskaplega viðeigandi. Allt öðruvísi en á Bahama-eyjum svo við látum okkur bara dreyma.

Djúpsteiktir kjúklingavængir með mangó og ananas sósu sem minan á suðrænar strendur. Kristinn Magnússon

„Wannabe conch fritters“ djúpsteiktar þorskbollur með bragðmikilli sósu. Kristinn Magnússon