Matur | Sunnudagsblað | 11.11.2017 | 14:03 | Uppfært 12.11.2017 19:07

Dásamleg döðlukaka með lakkríshrauni

Döðlukaka frá Sumac mbl.is/Kristinn Magnússon

Þetta er engin hefðbundin döðlukaka heldur þróuð af meisturunum á Sumac grill + drinks. Hér erum við að tala um döðlukarmelu, vanilluís og síðan lakkríshraun. Ef þessi blanda er ekki nóg til að fá hefðbundin matarunnanda til að gráta þá vitum við ekki hvað.

Dásamleg döðlukaka

230 g hveiti
11 g lyftiduft
5 g salt
200 g púðursykur
100 g döðlusíróp
100 g hunang
250 g mjólk
120 g brúnað smjör (soðið í potti þar til orðið létt brúnað)
140 g döðlumauk
3 stk. egg

Öllum þurrefnum blandað saman, bætt svo út í restinni rólega.

Sett í form og bakað á 160°C í 15mín. (Ef í stærri formum þá þarf meiri tíma).

Döðlukaramella

200 g sykur
60 g glúkósi
100 g rjómi
100 g döðlu-molasses

Sykur og glúkósi er soðið í potti þar til brúnast, þá er rjóma og döðlu-molasses bætt í og soðið þar til góð karamella hefur myndast.

Vanilluís

500 g mjólk
500 g rjómi
200 g eggjarauður
200 g sykur
1 stk. vanilla

Mjólk og rjómi hitað að suðu með vanillunni.

Eggjarauður og sykur þeytt saman þar til létt og ljóst. Hellið svo mjólkurblöndunni yfir eggin. Setjið í pott og hrærið rólega þar til blandan hefur náð 81°C. Kælið í klakabaði. Þegar blandan er orðin köld setjið í ísvél og hrærið ísinn upp.

Lakkríshraun

700 g rjómi
100 g sykur
100 g lakkrís

Setjið lítið eldfast mót inn í frysti og frystið yfir nótt eða í 3 tíma. Sjóðið upp á öllu og kælið. Setjið í rjómasprautu með 2 hylkjum. Sprautið svo rólega í eldfasta mótið og frystið. Þegar allt er frosið þá er lakkríshraunið brotið upp.