2500 miðar í boði í númeruð sæti á tónleika Morrisons

Van Morrison. AP

Tónlistarmaðurinn Van Morrison mun halda tónleika í Laugardalshöll 2. október. Að sögn Einars Bárðarsonar, tónleikahaldara hjá Concert ehf., mun miðasala á tónleikana hefjast 15. ágúst nk. Einungis verður selt í númeruð sæti og verða 2.500 miðar í boði sem að öllum líkindum verða mjög eftirsóttir. Tónleikarnir eru liður í Jazzhátíð Reykjavíkur og haldnir í samstarfi við tónleikafyrirtækið Concert ehf. en á laugardaginn var kynntur samningur sem gerður hefur verið á milli Concert ehf. og Jazzhátíðar Reykjavíkur um samstarf þeirra á sviði tónlistarviðburða tengdum hátíðinni.

"Ég er búinn að vera að vinna í því að fá hann til landsins í nokkur ár og það hefur ekki gengið fyrr en nú með samvinnu Concert og Jazzhátíðar Reykjavíkur," segir Einar Bárðarson og bætir því við að samstarfið hafi gengið mjög vel. "Mér finnst það vera mikill gæðastimpill fyrir það sem ég er að gera að svo virðuleg stofnun sem Jazzhátíð Reykavíkur og þeir duglegu menn sem að henni koma hafi viljað taka þátt í þessu verkefni með mér. Að svo stöddu komum við ekki meira að hátíðinni í ár en sem snertir tónleikana í Laugardalshöll en þeir eru sameiginlegt kynningarmál. Þeir kynna sína hátíð og þessir tónleikar eru inni í því og á meðan ég kynni þessa tónleika kynni ég Jazzhátíðina í leiðinni. Þannig að þetta er víðtækt samstarf á kynningargrundvelli," segir Einar.

Einar telur að erfitt sé að finna stærri nöfn í tónlistinni í dag og því verði menn að bíða þolinmóðir eftir næsta stórviðburði. "Við fáum þó kannski aðra stórtónleika á næsta ári."

Aðspurður segist Einar ekki búast við því að það komi upp vandamál samfara því að selja einungis miða í númeruð sæti. "Concert ehf. hefur einu sinni áður verið með tónleika í Laugardalshöll. Þá var einungis selt í númeruð sæti og það tók fimm mínútur fyrir tvö þúsund manns að koma sér fyrir. Það hefur verið rætt um það að þetta fyrirkomulag hafi vandamál í för með sér en þetta er einungis skipulagningaratriði og það er ekkert vandamál að selja þarna í sæti," segir Einar að lokum.