Breska poppstjarnan David Bowie var lagður inn á sjúkrahús í Þýskalandi en hann var með klemmda taug. Bowie neyddist því til að afboða komu sína á tónlistarhátíð um helgina, að því er skipuleggjendur hennar greindu frá í dag.
Bowie, 57 ára, lauk atriði sínu á Hurricane-hátíðinni í bænum Scheessel í N-Þýskalandi á föstudagskvöld en kvartaði síðan undan sárum verk í öxl. Hann var meðhöndlaður á sjúkrahúsi í bænum og lá inni yfir nóttina.
Bowie varð síðan að afboða komu sína á Southside-hátíðina í Neuhausen ob Eck, í S-Þýskalandi, en þar komu m.a. fram PJ Harvey og hljómsveitin The Cure.
Þá varð Bowie að hætta að syngja og spila á tónleikum í Prag í Tékklandi á miðvikudag vegna verks í öxl.