John Travolta viðurkennir að hann sé bindindismaður

Bandaríski leikarinn John Travolta hefur viðurkennt að hann sé alger bindindismaður. Rétt eftir að hafin var umfangsmikil bjórauglýsingaherferð fyrir Heineken með hann í aðalhlutverki.

Hann sagði serbnesku tímariti í viðtali að hann hafi hætt að drekka fyrir fullt og allt eftir að hafa farið einu sinni á fyllirí.

„Eftir það gerði ég mér grein fyrir því að alkóhól væri ekki fyrir mig,“ segir hann í viðtalinu. Frá þessu greinir Ananova.com.

„Ég drekk vatn með matnum. Stundum fæ ég mér te, en oftast drekk ég bara vatn.“

Heinekenverksmiðjurnar hollensku hafa veitt stórfé í auglýsingaherferð, í samstarfi við bandarísku kvikmyndaverin MGM og 20th Century Fox, fyrir kvikmyndina Be Cool, sem er framhald myndarinnar Get Shorty, og í auglýsingunum kemur Travolta fram í hlutverki Chilis Palmers, sem hann fer með í báðum myndunum.

Talsmaður Heineken vildi ekkert segja um hvort hætt yrði að sýna auglýsingarnar, og ekki heldur tjá sig um hvort Travolta hafi drukkið litað vatn við tökurnar.

• Blogga um frétt