Enn lengist röð þeirra frægu kvenna sem vilja fá gestahlutverk í sjónvarpsþáttunum vinsælu Aðþrengdar eiginkonur. Hefur leikkonan Halle Berry nú tjáð þá þrá sína að komast í þættina. „Ég yrði að leika illmenni,“ sagði hún í viðtali við Sky-sjónvarpið. „Mig langar að koma af stað einhverjum óknyttum.“
Frá þessu greinir Ananova og leiðir að því getum að líklegt sé að Berry fari framarlega í röð þeirra sem óskað hafa eftir gestahlutverki. Bæði Britney Spears og Pamela Anderson hafa áður látið í ljósi eindreginn vilja til að fá gestahlutverk.