Aukaleikari rekinn úr Aðþrengdum eiginkonum

Leikari sem leikur í nýrri þáttaröð Aðþrengdra eiginkvenna hefur verið rekinn fyrir ósæmilega hegðun. Þetta er fremur óheppilegt enda hófust sýningar á nýju þáttaröðinni í september síðastliðnum. Nú er verið að ráða í hlutverkið á nýjan leik en sýnt þykir að annar leikari verður að fara með hlutverk persónunnar Calebs, sem komið hefur fram í tveimur þáttum Aðþrengdra eiginkvenna.

Ekki kemur fram á fréttavef breska ríkisútvarpsins, BBC, fyrir hvaða hegðun maðurinn, sem heitir Page Kennedy, var rekinn að öðru leyti en því að forsvarsmenn sjónvarpsstöðvarinnar ABC, sem framleiðir þættina, tók ákvörðunina eftir ítarlega rannsókn.

Kennedy sagði í viðtali við fréttastofuna Associated Press fyrir stuttu að hann væri spenntur yfir því að hreppa hlutverk á þáttaröðinni. Hann neitaði að tjá sig um uppsögnina þegar eftir því var leitað.

28,2 milljónir áhorfenda sátu límdar við skjáinn þegar fyrsti þátturinn í nýju þáttaröðinni fór í loftið í september. Þykir forsvarsmönnum ABC það vonbrigði enda höfðu þeir vonast til að ná sama fjölda að skjánum þegar 30,3 milljónir áhorfenda horfðu á útsendingu síðasta þáttar fyrstu þáttaraðar í maí síðastliðnum.

Page Kennedy hefur leikið aukahlutverk í sjónvarpsþáttum á borð við „The Shield“ og „Six Feet Under“ auk þess sem hann lék í kvikmyndinni S.W.A.T.

• Blogga um frétt