Það hafa eflaust margir gripið andann á lofti í gær þegar komst í hámæli að leikkonan Emma Watson, sem leikið hefur Hermione Granger í Harry Potter-myndunum, hefði neitað að skrifa undir samning um að leika í síðustu tveimur myndunum. Samkvæmt fréttunum átti Watson, sem er sextán ára, að hafa hafnað tilboði sem kvað á um tvöföldun launa hennar, þ.e. að hún fengi rúmar 262 milljónir króna fyrir hvora mynd.
Warner Bros-kvikmyndaverið gaf í kjölfarið frá sér yfirlýsingu þar sem fram kemur að það sé „mjög líklegt" að Watson verði með.
„Við erum sannfærð um að Emma verði með í sjöttu og sjöundu myndunum," sagði talsmaður kvikmyndaversins í gær.