Klónarnir nálgast...

Nú fer bið Stjörnustríðsáhugamanna heldur betur að styttast en fimmta og jafnframt næstsíðasta myndin, Árás klónanna, verður frumsýnd hér á landi á föstudaginn kemur.

Eldheitustu aðdáendurnir komu saman í Smáralindinni aðfaranótt mánudagsins til að fjárfesta í miðum í tíma og biðu í allt að 15 klukkutíma til að tryggja sér aðgang að myndinni.

Baldvin Albertsson var einn þeirra áhugamanna sem lögðu biðina á sig og viðurkenndi hann í samtali við blaðið að léttur svefngalsi væri kominn í mannskapinn.

Baldvin sagðist mjög spenntur að sjá myndina en sagðist ekki vita við hverju ætti að búast þar sem hann hefði alltaf viljandi snúið sér undan þegar sýnishorn úr myndinni hefðu verið sýnd.

"Ég vona þó að biðin verði þess virði," sagði Baldvin, sem sagði þá félagana hafa mætt með tilheyrandi sverð og grímur í biðröðina til þess að koma sér í viðeigandi Stjörnustríðsham.