Kunnur fréttamaður bandarísku sjónvarpsstöðvarinnar CNN var handtekinn í Central Park í gærkvöldi með fíkniefni. Dómari féllst á að kveða upp skilorðsbundinn dóm gegn því að maðurinn gengist undir fíkniefnameðferð.
Fréttamaðurinn, Richard Quest, var handtekinn klukkan 3:40 að bandarískum tíma. Að því er kom fram í dómnum sagði hann við lögreglu að hann væri með metamfetamín í vasa sínum þegar hann var handtekinn. Reyndist hann vera með lítið magn af efninu í plastpoka.
Quest var einnig ákærður fyrir að vera á ferð í Central Park eftir að garðinum var lokað. Lögmaður hans sagði að Quest hefði verið á leið á hótel sitt ásamt vinum sínum og ekki gert sér grein fyrir því að garðurinn væri lokaður.
Quest, sem er 46 ára og breskur ríkisborgari, sér einkum um þætti um viðskiptaferðir á CNN. Hann vekur athygli fyrir óvenjulega rödd og framkomu.