Sko skýtur föstum skotum á Símann

Glöggir útvarpshlustendur hafa máske tekið eftir auglýsingum frá símafyrirtækinu Sko, þar sem skotið er föstum skotum að Símanum og herferð hans, sem byggist á Merzedes Club-hópnum. Í auglýsingunni segir til dæmis: „Hó hó hó I say hey hey hey“ sem er augljós skírskotun til Eurovision-framlags hópsins og á öðrum stað segir: „Láttu ekki gabbast af taninu,“ sem er vísun til litarhafts karlpeningsins í Merzedes Club.

Ekkert sérlega óánægður

Umboðsmaður Merzedes Club, Valgeir Magnússon, segir herferð Sko ekkert sérstaklega sniðuga. „Það vita auðvitað allir hvað verið er að tala um í þessari auglýsingu, en mér finnast aldrei sniðugar þær herferðir sem benda á vörumerki keppninautarins. Þess vegna er ég alls ekkert óánægður með þessa herferð Sko,“ segir Valgeir kankvís.

Upplýsingafulltrúi Símans, Linda Björk Waage, segist ekki munu aðhafast neitt í málinu. „Ef þeir kjósa að nýta sér okkar ágætu auglýsingaherferð, er það bara þeirra mál. Ef þeir hafa engar betri hugmyndir fram að færa sjálfir, verður bara að hafa það.“

Síminn vaknaði

Pála Þórisdóttir hjá markaðsdeild Sko segir auglýsinguna innanbúðarhugmynd. „Málið er að Síminn var farinn að finna fyrir samkeppni okkar og reis þá upp á afturfæturna og fór í stóru herferðina með Mercedes Club. Okkur fannst því ástæða til að minna á hverjir væru í raun ódýrastir og það er punkturinn í auglýsingunni.“