Engin kona á meðal lagahöfunda

Valnefnd á vegum Sjónvarpsins hefur valið þau fimmtán lög sem keppa í Söngvakeppni Sjónvarpsins sem fram fer í janúar á næsta ári. Alls bárust 217 lög inn á borð valnefndarinnar sem er leynilega skipuð og tók hún sér eina helgi í að hlusta á lögin og velja þau lög sem hún taldi vænlegust.

Þónokkrir góðkunningjar keppninnar verða aftur á ferðinni að þessu sinni en þar má helst nefna þá Örlyg Smára sem var boðin þátttaka í ár, Hallgrím Óskarsson, Óskar Pál Sveinsson, Torfa Ólafsson og Albert G. Jónsson. Alls eru lagahöfundar þrettán, en þrír af þeim eiga tvö lög; þeir Hallgrímur Óskarsson, Heimir Sindrason og Óskar Páll Sveinsson. Athygli vekur að enga konu er að finna á meðal þeirra lagahöfunda sem valdir voru áfram.

Dómnefnd í myndinni

Fjögur lög keppa í beinni útsendingu frá myndveri Sjónvarpsins 10., 17., 24. og 31. janúar. Áhorfendur velja með símakosningu tvö lög sem komast áfram í úrslitaþáttinn en enn eru uppi þær hugmyndir að sérvalin dómnefnd hafi ákveðið vægi í lokakeppninni. Laugardagskvöldið 7. febrúar verður upprifjunarþáttur og hinn 14. febrúar keppa átta lög í úrslitaþættinum, sem verður einnig sendur út frá myndveri Sjónvarpsins. Vinningslagið verður svo framlag Íslands í Söngvakeppni evrópskra sjónvarpsstöðva sem fram fer í Rússlandi í maí á næsta ári.

Lögin verða frumflutt á Rás 2 í vikunni áður en þau verða flutt í Sjónvarpinu til að gefa áhorfendum kost á að kynnast lögunum áður en þau keppa í beinni útsendingu. hoskuldur@mbl.is