Brasilíska lögreglan segir að fyrrverandi ástkona knattspyrnustjörnunnar Bruno Fernandes, sem hefur verið saknað, hafi verið kyrkt og að hundar hafi verið fóðraðir á líki hennar.
Fernandes er markvörður knattspyrnuliðsins Flamenco. Hann gaf sig fram við lögreglu eftir að gefin var út handtökutilskipun á hendur honum. Fyrrverandi ástkona hans, Eliza Samudio, var 25 ára. Hún hvarf fyrir um mánuði.
Knattspyrnumaðurinn hefur neitað sök og segist vera með hreina samvisku, að því er fram kemur á vef breska útvarpsins. Hann er einnig 25 ára gamall.
Lögreglan segir að ungur frændi Fernandes hafi við skýrslutöku sagt að markvörðurinn hafi átt þátt í því að ræna Samudio og myrða hana.
Samudio á að hafa sagt að Fernandes, sem er kvæntur annarri konu, væri faðir barnsins hennar.
Lögreglan segir að ráðist hafi verið á Samudio á hóteli í Rio de Janeiro daginn sem hún hvarf. Hún hafi svo verið kyrkt í borginni Belo Horizonte. Líkið hafi verið bútað niður og hundar fóðraðir á hluta þess á meðan restin hafi verið grafin undir steinsteypu.
Lögreglan hefur ekki fundið líkamsleifarnar, en segist hins vegar hafa sannað það að hún hafi verið myrt með fyrrgreindum hætti.