Tveir hermenn létust í suðausturhluta Tyrklands þegar jarðsprengja sprakk. Talið er að sprengjunni hafi verið fjarstýrt af liðsmönnum kúrdíska verkamannaflokksins PKK.

Árásin átti sér stað þegar bílalest tyrkneska hersins var á leið um héraðið Sirnak sem landamæri á að Írak og Sýrlandi. Fréttaveita AFP greinir frá því að skotbardagi braust út milli tyrkneskra hermanna og liðsmanna PKK eftir sprenginguna.

Hermálayfirvöld í Tyrklandi hafa staðfest við AFP að tveir hermenn hafi látið lífið á vettvangi. Þriðji maðurinn hefur verið fluttur á sjúkrahús. Nánari upplýsingar um líðan hans liggja ekki fyrir, en talið er að hann sé nokkuð særður eftir árásina.

Liðsmenn PKK hafa heldur betur sótt í sig veðrið að undanförnu og hefur árásum þeirra á hersveitir Tyrklands fjölgað mjög síðastliðnar tvær vikur. Á sama tíma heldur flugher Tyrklands úti loftárásum á skotmörk í norðurhluta Íraks. Beinast árásirnar gegn liðsmönnum Ríkis íslams og sveitum kúrda.

Tengdar fréttir

Ríki íslams

Neita að tjá sig um Ríki íslams

• Vara við hugsanlegum hryðjuverkum í Moskvu
• Ekki vitað um aðra ISIS-liða
• Ríki íslams lýsir árásinni á hendur sér
• Leiðtogi Ríkis íslams sagður látinn

» Fleiri tengdar fréttir

• Blogga um frétt