Lögreglan á Filippseyjum tilkynnti í dag að hún hefði handtekið 43 útlendinga, flesta þeirra Kínverja, fyrir að ræna konu frá Singapúr í einu af spilavítum höfuðborgarinnar Manila, að því er Reuters-fréttastofan greinir frá.
Telur lögregla mennina vera gengi okurlánara sem hafi beint sjónum sínum að einstaklingum sem spila með háar fjárhæðir í spilavítunum. 11 sambærileg mál hafa komið upp á borð filippseysku lögreglunnar frá því 2015 þar sem tveir hópar, sem aðallega eru skipaðir Kínverjum og Singapúrbúum, koma við sögu.
Að þessu sinni var konu rænt úr Solaire-spilavítinu sl. mánudag og farið með hana á hótel í nágrenninu, þar sem henni var misþyrmt og ógnað. Kröfðust ræningjarnir 180.000 dollara fyrir að láta hana lausa, að því er segir í skýrslu frá útlendingastofnun landsins.
Ronald dela Rosa ríkislögreglustjóri segir konunni hafa verið bjargað daginn eftir og að búið sé að kæra tvo Malasíumenn og 41 Kínverja vegna málsins.