Leita upplýsinga um hrottalegt morð

Lögreglan í Nashville í Tennessee í Bandaríkjunum hefur nú biðlað til almennings um upplýsingar sem hjálpað geta til við rannsókn á óhugnanlegu morði á 12 ára gamalli stúlku í borginni. 

„Þetta er hræðilegt og mjög hrottalegt mál. Ég hef aldrei nokkurn tímann séð neitt jafn hrottafengið á mínum starfsferli,“ sagði varðstjórinn David Kautzman á blaðamannafundi í gær. 

Hin 12 ára gamla Yhoana Arteaga fannst látin á heimili sínu þann 10. ágúst síðastliðin. Fjölskylda hennar sá hana síðast á lífi um hádegi þann dag, en seinnipartinn fékk móðir hennar skilaboð frá henni þar sem hún sagði einhvern vera að banka á dyr heimilisins. Klukkutíma síðar kom móðirin heim með tvö systkini stúlkunnar, og fann dóttur sína látna.

Bráðabirgðaniðurstöður krufningar leiddu í ljós að stúlkan hafði verið myrt með hrottafengnum hætti. Rannsakendur málsins telja stúlkuna hafa þekkt morðingja sinn. 

„Án þess að fara út í of mikil smáatriði þá var mikið af áverkum á líkama hennar. Fötin hennar voru öll tætt,“ sagði Don Aaron, talsmaður lögreglunnar.

„Við getum ekki tjáð okkur um tengsl þeirra á þessum tímapunkti. En ef einhver er að hlusta sem þekkir Yhoana eða fjölskyldu hennar og hefur einhverjar grunsemdir um einhvern tengdan fjölskyldunni vinsamlegast tilkynnið okkur það,“ sagði Kautzman.

Frétt CBS fréttastofunnar.

• Blogga um frétt