Höfnuðu risaverkefni vegna mörgæsa

Síle hefur hafnað rúmlega 260 milljarða króna fjárfestingarverkefni í járnnámu í landinu til þess að vernda mörgæsategund sem er í útrýmingarhættu. Frá greinir AFP.

Námufyrirtækið Andes Iron sóttist eftir því að hefja námugröft í járnnámu í Coqumbo-héraði og var verkefnið metið á tvo og hálfan milljarð bandaríkjadala sem nemur rúmlega 260 milljörðum króna.

Ákveðið var innan stjórnarráðs landsins að hafna verkefninu þar sem stjórnvöldum þótti námufyrirtækið ekki hafa sýnt fram á að fyrirbyggjandi aðgerðir kæmu í veg fyrir skaða á mörgæsastofni í útrýmingarhættu á því svæði sem námugröfturinn átti að fara fram. Um er að ræða mörgæsir af Humboldt-tegund.

Umhverfisráðherra landsins segir ríkisstjórnina hlynnta verkefnum sem stuðli að frekari hagvexti ríkisins en aðgerðirnar sem námufyrirtækið ætlaði að ráðast í til að fyrirbyggja umhverfisspjöll hefðu ekki verið nægilega miklar til að tryggja mörgæsirnar. „Við erum ekki á móti efnahagslegri uppbyggingu eða verkefnum sem eru nauðsynlegar hagvextinum, en þeir verða að bjóða viðeigandi ráðstafanir vegna umhverfisáhrifanna sem námugröfturinn mun hafa,“ segir Marcelo Mena, umhverfisráðherra Síle.

• Blogga um frétt