Norski Verkamannaflokkurinn vill að foreldrum verði gert skylt að bólusetja börn sín, en mislingatilfellum fer nú fjölgandi í Noregi eins og víða annars staðar í Evrópu. Vonast flokkurinn eftir að fá þingið til að samþykkja tilraunaverkefni í Ósló þar sem gert verði skylt að bólusetja börn í borginni.
„Við teljum að það sé orðið tímabært að taka það skref,“ hefur norska ríkisútvarpið NRK eftir þingmanni flokksins, Tuvu Moflag, sem á einnig sæti í heilbrigðisnefnd þingsins.
NRK segir þrjú mislingatilfelli hafa greinst í austurhluta Noregs í þessari viku. Enginn hinna smituðu hafði verið bólusettur og allir þrír voru að koma til landsins eftir dvöl erlendis.
Í Ósló, líkt og öðrum sveitarfélögum í Noregi, er mælt með að börn séu bólusett áður en þau ná tveggja ára aldri. Nokkrir foreldrar hafa þegar í vikunni verið beðnir af heilbrigðisyfirvöldum að láta bólusetja börnin.
Moflag segir alvarlegt mál þegar foreldrar koma börnum sínum í svo hættulegar aðstæður. Þess vegna vilji Verkamannaflokkurinn ganga lengra og skylda bólusetningu.
Ekki eru allir þingmenn stjórnarflokkanna hins vegar þessu sammála og því óvíst að frumvarpið nái í gegn.
„Þessi tillaga gengur of langt. Bólusetning þarf að byggja á trausti,“ segir Sveinung Stensland, þingmaður Hægri, sem einnig á sæti í heilbrigðisnefndinni.
Þá er Åse Michaelsen, ráðherra lýðheilsumála og þingmaður Frelsisflokksins, einnig efins um frumvarpið.
Moflag er hins vegar sannfærð um að það virki og auki aðhald með þeim foreldrum sem ekki láta bólusetja.