Erlent | mbl | 10.12.2018 | 13:31 | Uppfært 11.12.2018 7:00

Neyðarástand vegna hríðarbyls

Umferðaróhöppin í Norður-Karólínu, Virginíu og fleiri ríkjum suðausturhluta Bandaríkjanna síðustu daga skipta hundruðum vegna mikillar snjókomu. AFP

Neyðarástandi hefur verið lýst yfir í Norður-Karólínu vegna óveðurs með mikilli snjókomu sem gengið hefur yfir suðausturhluta Bandaríkjanna um helgina. Mest hefur snjódýptin mælst um 50 sentimetrar í N-Karólínu.

Maður lést eftir að tré féll á bíl hans og leit stendur yfir að ökumanni en bíll hans fannst mannlaus í á í ríkinu.

Here are the expected snowfall accumulations for parts of the Mid-Atlantic and Southeast, especially North Carolina and Virginia. These potential amounts will generally occur over the next 6 to 12 hours, before the intensifying low along the Southeast coast gradually moves away. pic.twitter.com/FJwxngb5jN
— NWS (@NWS) December 9, 2018

Þá eru hundruð þúsunda heimila án rafmagns. Áfram er spáð vindi og mikilli snjókomu á svæðinu næstu daga. Michael Schichtel, veðurfræðingur á Veðurstofu Bandaríkjanna, segir að upphaflega gerðu spár ráð fyrir að snjóstormurinn yrði á bak og burt í dag en hann virðist ætla að ílengjast í suðausturríkjunum.

Samgöngur liggja víðast hvar niðri og hefur fjölmörgum flugferðum verið aflýst vegna veðurs. Um 60 umferðaróhöpp hafa verið tilkynnt í Virginíu en yfir 500 í N-Karólínu. Roy Cooper, ríkisstjóri N-Karólínu, segir í samtali við CNN að snjórinn sé ekki mesta áhyggjuefnið heldur aðstæðurnar sem myndast á vegunum vegna hans.