Icelandic Water Holdings ehf. sem síðastliðin þrjú ár hefur starfsrækt átöppunarverksmiðju fyrir Iceland Glacial vatnið í Þorlákshöfn, gangsettu í dag nýja verksmiðju í landi Hlíðarenda í Ölfusi.
Verksmiðjan er um 6.700 fermetrar að stærð og mun í fyrri áfanga anna átöppun um 100 milljón lítra á ári. Hún er búin sérstöku orkustjórnunarkerfi til að halda áhrifum á umhverfi og náttúru í lágmarki, að því er segir í tilkynningu frá fyrirtækinu.
Stofnendur Icelandic Glacial, þeir Jón Ólafsson og Kristján Ólafsson, ræstu fyrri framleiðslulínu verksmiðjunnar formlega í dag ásamt Össuri Skarphéðinssyni iðnaðarráherra. Að því loknu gróðursettu þeir ásamt sveitarstjóra Ölfuss, Ólafi Áka Ragnarssyni, og börnum úr Ölfusi fyrstu trén sem ætlað er að mynda sérstakan lund í nágrenni verksmiðjunnar.