Nýtt umhverfislistaverk eftir Christo afhjúpað í New York

Hliðin, nýtt umhverfislistaverk eftir hjónin Christo og Jeanne-Claude, sem sett hefur verið upp í Miðgarði (Central Park) í New York, hefur vakið mikla athygli og skiptist álit gesta mjög í tvö horn. Margir hafa lagt leið sína í Miðgarð til að skoða verkið frá því það var afhjúpað í gær.

Verkið samanstendur af 7500 hliðum sem reist eru yfir gangstíga garðsins og á hliðin eru hengdar gulleitar veifur. Kostnaður við verkið og uppsetningu þess er um 20 milljónir dala, jafnvirði um 1,3 milljarða króna, en þau Christo og Jeanne-Claude sjá alfarið sjálf um fjármögnunina.

Christo og Jeanne-Claude eru heimsfræg fyrir óvenjuleg umhverfislistaverk en kunnust eru þau fyrir að hafa klætt þinghúsið í Berlín í plast. Verkið í Miðgarði nefnist fullu nafni: Hliðin, Miðgarði, New York borg, 1979-2005, vegna þess að þau hjón, sem fæddust bæði árið 1935, hann í Búlgaríu en hún í Marokkó, hafa unnið að því í 26 af þeim rúmu 40 árum sem þau hafa búið í New York.

Hjónin Christo og Jeanne-Claude við eitt verka sinna. AP

• Blogga um frétt