Aðþrengda eiginkonan Eva Longoria er efst á árlegum lista tímaritsins Maxim yfir þær 100 konur sem hafa mestan kynþokka - en sjálfri finnst Evu að Angelina Jolie ætti heiðurinn skilið. Stökk Evu er stórt, því að í fyrra var hún í 91. sæti á þessum lista.
En það var áður en hún fékk hlutverk Gabrielu Solis í þessum fádæma vinsælu sjónvarpsþáttum, eins og Ananova.com bendir á.
„Þetta er eiginlega bæði mjög gaman og mjög óvænt, einkum vegna þess að í fyrra var ég númer 91,“ segir Eva. Hún telur þó að Jolie, sem er númer níu á listanum, ætti að vera í fyrsta sæti: Jolie, segir Eva, „er skilgreiningin á kynþokka“.