Bush þurfti að bregða sér frá

Rick Wilking, ljósmyndari Reutersfréttastofunnar, sem var að taka myndir í þingsal Sameinuðu þjóðanna í New York í gær, sá að George W. Bush var að skrifa á miða á borðinu fyrir framan sig. Ljósmyndarinn náði mynd af miðanum en á honum reyndust ekki vera ríkisleyndarmál heldur yfirlýsing um að Bush þyrfti að komast á snyrtinguna.

„Ég held að ég þurfi að fara á snyrtinguna. Er það mögulegt..." virðist standa á miðanum.

Reutersfréttastofan sendi myndina frá sér í gær og með henni fylgdi eftirfarandi texti:

George W. Bush, Bandaríkjaforseti, skrifar miða til Condoleezza Rice, utanríkisráðherra, meðan á fundi öryggisráðs Sameinuðu þjóðanna stendur í tengslum við leiðtogafund og 60. allsherjarþing Sameinuðu þjóðanna í New York 14. september 2005.

Bush ræðir við Condoleezza Rice, utanríkisráðherra, í fundarsal SÞ í gær. AP

• Blogga um frétt