Sigur Rós á heimaslóðum

Heimildamyndin Heima verður frumsýnd í haust, en hún sýnir tveggja vikna tónleikaferðalag hljómsveitarinnar Sigur Rósar um Ísland á síðasta ári. Ferðalagið markaði lok átján mánaða tónleikaferðalags sveitarinnar um heiminn, en hún lék á alls 160 hljómleikum í kjölfar útgáfu plötunnar Takk. Kynningarmyndband um myndina er í dag frumsýnt á mbl.is og á vefsíðu tónlistartímaritsins NME.

Á ferðalaginu lék hljómsveitin í Ólafsvík, Djúpuvík, á Ísafirði, Hálsi í Öxnadal, Seyðisfirði, Snæfelli við Kárahnjúka, Ásbyrgi og Klambratúni svo nokkuð sé nefnt. Auk þess tók sveitin þátt í þorrablóti Kvæðamannafélagsins Iðunnar á Kirkjubæjarklaustri, spilaði við safn Samúels Jónssonar í Selárdal, Leiksskálum á Vík, Álafossi og Gömlu Borgum.

Þá verður gefin út tvöföld geislaplata samhliða útgáfu myndarinnar sem fengið hefur titilinn Hvarf – Heim.

Geislaplatan Hvarf mun innihalda áður óútgefin lög, en á plötunni Heim verða sex lög í órafmagnaðri útgáfu, sem tekin voru upp sérstaklega fyrir myndina.

• 2 blogg um fréttina

Bloggað um fréttina

• Einar Bragi Bragason.: Sigurrós á heimaslóðum
• Ómar Ingi: Get varla beðið