„Þegar við fáum upp úr kössunum svona skemmtilega og óvænta gamla hluti þá höldum við upp á þá til þess að geta boðið þá upp á uppboði sem þessu,“ segir Halldóra Eldon, aðstoðarverslunarstjóri Góða hirðisins.
Í gær fór fram uppboð á sérstökum munum í húsnæði hans sem stjórnað var af tónlistarmanninum KK. Að sögn Halldóru seldust munir á því fyrir 380 þúsund krónur á þeim eina klukkutíma sem uppboðið stóð yfir.
Góði hirðirinn hefur áður staðið fyrir uppboðum sem þessu en ágóðanum af þeim er varið til sérstakra verkefna á sviði góðgerðarmála. Að þessu sinni rann hann til Bjarkaráss sem veitir fötluðu fólki dagþjónustu, hæfingu og vinnu.