Rúta valt með 15 farþega um einn kílómetra frá Freysnesi í Öræfasveit. Meiðsl á fólki eru minniháttar en talið er að fimm manns hafi slasast lítillega. Fólkið var flutt á Hótel Skaftafell þar sem sjúkraflutningamenn huga að meiðslum þess. Ekki hefur verið tekin ákvörðun hvort flytja þurfi einhvern á sjúkrahús, að sögn lögreglunnar á Suðurlandi.
Tvær rútur til viðbótar lentu einnig í vandræðum og voru farþegar þeirra fluttir á hótelið. Björgunarsveitin Kári var fyrst á vettvang. Sjúkrabíll og lögregla frá Höfn í Hornafirði fór á vettvang en lögreglu og sjúkrabílar frá Hvolsvelli og Kirkjubæjarklaustri komust ekki á staðinn sökum vonskuveðurs.
Vegurinn frá Kirkjubæjarklaustri að Jökulsárlóni er lokaður en ákaflega lélegt skyggni er á svæðinu.