„Þau koma ekki á óvart, viðbrögð ferðaþjónustunnar. Þau eru eins og vænta mátti,“ segir Haraldur Benediktsson, formaður fjárlaganefndar Alþingis.
Í gær höfðu borist 102 umsagnir til Alþingis um áætlunina, flestar neikvæðar. Þær koma aðallega frá fyrirtækjum og samtökum í ferðaþjónustu og stofnunum ríkisins.
Fjárlaganefnd hefur verið að vinna að málinu. Fulltrúar landshlutasamtaka sveitarfélaga og einstakra sveitarfélaga komu á fundi nefndarinnar í liðinni viku auk þess sem nefndarmenn hafa verið að kynna sér forsendur áætlunarinnar og bakgrunn hjá fjármálaráðuneytinu. Á miðvikudag taka tvær nefndir þingsins á móti fjármálaráði. Þá reiknar Haraldur með að fá umsagnir fastanefnda þingsins undir lok vikunnar.