Byggingakrani féll þegar verið var að taka hann niður við Vesturbæjarskóla um klukkan hálftvö í dag. Að sögn Atla Hafsteinssonar, staðarstjóra hjá Munck á Íslandi, sem er verktaki á svæðinu, slóst kraninn utan í annan krana en engin slys urðu á fólki. Segir hann kranann hafa skemmst þegar verið var að taka hann niður.
Ekki er ljóst að svo stöddu hvað olli skemmdunum á krananum, en að sögn Atla hefur eitthvað gefið sig þegar verið var að taka hann niður. „En hann féll ekki upp úr þurru,“ áréttar hann.
Skemmdir urðu á krananum sjálfum, og smávægilegar skemmdir á þeim sem hann slóst utan í en ekki urðu frekari skemmdir á svæðinu.