Tveir menn sem lentu í vanda við Stóru-Ávík í Árneshreppi á níunda tímanum í morgun fóru fram á kletta í svonefndu Túnnesi rétt við bæinn. Annar mannanna fór of framarlega og féll fram af klettunum en stoppaði á klettasyllu um metra frá sjónum. Félagi mannsins reyndi að koma honum til staðar en féll einnig fram af syllunni.
Eins og greint var frá í morgun fóru björgunarsveitarmenn á staðinn auk björgunarskips frá Skagaströnd. Upphaflega var talað um að mennirnir hefðu fallið í sjóinn.
Fréttaritari mbl.is í Árneshreppi segir að einn björgunarsveitarmaður hafi verið látinn síga niður til mannanna. Kaðall var bundinn utan um þá og þeir voru síðan dregnir upp einn í einu. Þetta gekk vel og vonum framar að sögn fréttaritarans.
Mennirnir voru orðnir mjög kaldir og var þeim komið í hús í Stóru-Ávík þar sem hlúð var að þeim. Mennirnir voru óbrotnir eftir fallið.
Sjúkrabíll kom frá Hólmavík ásamt lækni og einnig kom lögreglan á staðinn. Einnig var þyrla Landhelgisgæslunnar kölluð út en henni var síðan snúið við, þegar vitað var að heimamönnum tókst að bjarga mönnunum upp.