Nú hafa 28 þúsund manns skráð sig í gegnum vefinn arfgerd.is og 24 þúsund þeirra hafa fengið svar um hvort þeir beri genabreytinguna 999del5 í BRCA2-geni, skv. upplýsingum frá Íslenskri erfðagreiningu.
Genabreytingin á að stórauka líkur á brjóstakrabbameini og fleiri tegundum krabbameins. Hafa 118 einstaklingar fengið svar um að þeir beri genabreytinguna og hafa 47 þeirra hringt í erfðaráðgjöf Landspítala Íslands (LSH) og að auki nokkrir ættingjar þeirra.
Þetta kemur fram í skriflegu svari erfða- og sameindalæknisfræðideildar LSH við fyrirspurn Morgunblaðsins.