Heimilt að rífa stóra strompinn

Niðurrif á reit Sementsverksmiðjunnar á Akranesi, sem var reist á árunum 1956 til 1958, stendur yfir. Niðurrifinu á að ljúka fyrir 1. október næstkomandi.

Sementstankarnir stóru munu standa áfram. Einnig voru hugmyndir um að sementsstrompurinn, 68 metra hár, fengi að standa, en hann hefur í hugum margra verið tákn Akraness.

Hins vegar samþykktu 94% íbúa Akraness í ráðgefandi kosningu að strompurinn skyldi felldur, að því er fram kemur í Morgunblaðinu í dag. Bæjarstjórn Akraness samþykkti á dögunum samhljóða tillögu þess efnis. Skipulagsstofnun hefur nú staðfest að niðurrif sé heimilt.