Þyrlur og flugvél Landhelgisgæslunnar hafa það sem af er ári farið í 265 útköll og hafa þau aldrei verið fleiri. Flugdeildin hefur því sett enn eitt metið í fjölda útkalla.
Landhelgisgæslan greinir frá því, að allt árið í fyrra hafi loftför Gæslunnar farið í 257 útköll en undanfarin ár hafi útköllunum fjölgað frá ári til árs.
Til samanburðar hafi þau verið 160 árið 2011.
Þá segir, að útköll fyrstu ellefu mánuði ársins 2018 séu því 65% fleiri en allt árið 2011.
„Þá hafa útköll í hæsta forgangi verið rúmur þriðjungur allra útkalla ársins en tölurnar benda til þess að sjúkraflugi á land hafi fjölgað töluvert milli ára. Fjölgun útkalla loftfara Landhelgisgæslunnar hefur það í för með sér að löggæslu- og eftirlitsflug eru færri en oft áður,“ segir í tilkynningu frá Landhelgisgæslunni.