Algengt að vottorð séu vefengd

Algengt er að lögreglustjórar vefengi starfshæfnivottorð starfsmanna sem snúa aftur vegna veikinda og fái trúnaðarlækna til að endurmeta starfshæfni þeirra.

Þetta segir Snorri Magnússon, formaður Landssambands lögreglumanna, í Morgunblaðinu  í dag. Hann segir að fjöldi mála af þessu tagi lendi á borði Landssambands lögreglumanna og kveðst oft þurfa að berjast fyrir endurkomu manna í vinnu eftir veikindi vegna þess að lögreglustjórar hafi verið að draga í efa starfsvottorð sem gefin eru út af læknum. Hann staðfestir að eitt slíkt mál sé í vinnslu hjá lögfræðingum Landssambands lögreglumanna eins og er.

Að sögn Snorra þurfa ríkisstarfsmenn sem hafa verið frá starfi vegna veikinda í ákveðinn tíma að sanna starfshæfni sína með vottorði frá lækni en forstöðumaður hefur rétt á að kalla eftir áliti trúnaðarlæknis sem komist oft að annarri niðurstöðu en sérfræðilæknir.