Góð staða Mosfellsbæjar

341 milljón króna afgangur varð af rekstri Mosfellsbæjar fyrir árið 2023 en ársreikningur sveitafélagsins var lagður fram á fundi bæjarráðs Mosfellsbæjar í dag.

Í fréttatilkynningu frá Mosfellsbæ kemur fram að reksturinn sé í góðu samræmi við fjárhagsáætlun en árið einkenndist af miklum framkvæmdum, meðal annars byggingu nýs leikskóla, endurbótum á Kvíslarskóla, byggingu íþróttahúss og gatnagerð. 

Þá hafi bærinn tekið yfir rekstur Skálatúns, heimilis fyrir fatlaða íbúa, þann 1. júlí 2023 en á Skálatúni búa 32 íbúar og starfsmenn eru 110 í 70 stöðugildum.

Tekjur ársins námu alls 20.305 milljónum, launakostnaður 9.466 milljónum, hækkun lífeyrisskuldbindinga 433 milljónum og annar rekstrarkostnaður var 7.721 milljónir og nemur framlegð því 2.684 milljónum. Afskriftir voru 590 milljónir og nam rekstrarniðurstaða fyrir fjármagnsliði 2.095 milljónum.

Fjármunatekjur, fjármagnsgjöld og tekjuskattur námu 1.733 milljónum og var rekstrarniðurstaða ársins því jákvæð um 341 milljón. Veltufé frá rekstri var 1.935 milljónir eða 9,5% af tekjum. Eigið fé í árslok nam 7.757 milljónum og eiginfjárhlutfallið er 24,3%. Skuldaviðmið er 94,5% og er því vel innan þess 150% hámarks sem kveðið er á um í lögum.

Sjöunda fjölmennasta sveitarfélagið

Kostnaður vegna verðbóta nam 1.285 milljónum eða 330 milljónum meira en gert var ráð fyrir í fjárhagsáætlun. Þá nam kostnaður vegna hækkunar lífeyrisskuldbindinga 433 milljónum.

Íbúar Mosfellsbæjar voru 13.403 þann 1. janúar 2024. Mosfellsbær er sem fyrr sjöunda fjölmennasta sveitarfélag landsins og þar störfuðu 945 starfsmenn í 782 stöðugildum í árslok 2023.

Ársreikningurinn verður tekinn til fyrri umræðu í bæjarstjórn þann 24. apríl 2024 og gert er ráð fyrir því að seinni umræða í bæjarstjórn fari fram þann 8. maí.

Sýnir sterka stöðu sveitafélagsins

„Ársreikningurinn sýnir sterka stöðu sveitarfélagsins en skuldaviðmiðið er að lækka úr 104,4 % í 94,5 % á milli ára. Á sama tíma erum við vissulega að kljást við verðbólgu og háa vexti sem er áskorun fyrir sveitarfélag í örum vexti,“ segir Regína Ásvaldsdóttir, bæjarstjóri Mosfellsbæjar.

• Blogga um frétt