Hálfþrítug stúlka, Becky Nyang sem var á ferðalagi á eyjunni Corfu, slapp stórslösuð en þó lifandi þegar eldingu laust niður í málmprjón sem hún var með í gataðri tungunni.
Hún var með vinkonu sinni á eyjunni þegar tók að rigna. Elding hrökk af bogagöngum nærri þeim vinkonunum og í málmprjóninn sem hefur verkað eins og eldingarvari. Stúlkan fékk alvarleg brunasár á andliti og fótum, þar sem straumurinn leiddi út og má teljast lánsöm að hafa lifað af.
Oft hefur verið fjallað um sýkingarhættu sem vill vera samfara ístungnum skartgripum af þessu tagi en hitt er nýtt að vara þurfi við raflosti.