Auglýst eftir konum til að prófa „Orgasmatron“

Bandarískir læknar hafa auglýst eftir sjálfboðaliðum úr hópi kvenna til að reyna tæki sem hlotið hefur nafnið „Orgasmatron“ en sé tækið grætt í konur á það að stuðla að auknum unaðssemdum ástarlífsins.

Greint er frá þessar uppfinningu í nýjasta hefti breska tímaritsins New Scientist sem lítur dagsins ljós á morgun. Skurðlæknir nokkur datt fyrir slysni niður á uppgötvunina fyrir rúmum tveimur árum þegar hann framkvæmdi venjulega aðgerð á konu þar sem markmiðið var að draga úr verkjum.

Aðgerðin felur í sér að grædd eru tvö rafskaut í hrygg konunnar og afar vægum rafstraumi hleypt á. Sjúklingarnir eru með meðvitund meðan á aðgerðinni stendur og geta því sagt til um hvenær dregur úr verkjum.

Í þessu tilviki fékk konan samstundis fullnægingu og það varð til þess að skurðlæknirinn Stuart Meloy ákvað að þróa hugmyndina frekar. Hann komst að því að meðferðin hentaði sérstaklega vel konum sem hafa átt við vanda að etja í samlífinu.

Hann áætlar að þegar tækið verði fullþróað muni það vera á stærð við gangráð. Tækið verður grætt undir húðina og unnt er að kveikja á því með fjarstýringu.

Undirtektir kvenna við þessu hafa þó verið dræmar og einungis ein kona hefur prófað tæki en önnur til viðbótar hefur gefið kost á sér. Nauðsynlegt er að átta konur til viðbótar gefi kost á sér til að prófa tækið. „Ég hélt að síminn hjá mér myndi ekki stoppa, það myndu svo margar konur vilja taka þátt í tilrauninni,“ segir Meloy í samtali við New Scientist. „En ég er í mestu vandræðum með að finna þátttakendur.“

Kynlífsráðgjafar hafa brugðist ókvæða við uppfinningu Meloys og segja kynkulda kvenna stafa af andlegum þáttum en ekki líkamlegum.

• Blogga um frétt