76 ára gömul kona á karlaveiðum í Ísrael

Við leit sína að draumaprinsinum hefur Ruth Westheimer gripið til ýmissa ráða og ferðast víða, til dæmis til Frakklands. Hún er þýsk að uppruna en hefur búið í Bandaríkjunum frá árinu 1956. Nú dvelur Westheimer hins vegar í Ísrael og hefur ekki farið leynt með að þar vonist hún til að finna draumaprinsinn. Hefur hún komið fram bæði á útvarps- og sjónvarpsstöðvum landsins og vonast þannig til að finna álitlega karlmenn.

Westheimer, sem hefur þrisvar sinnum verið gift, hefur þegar átt eitt stefnumót í þessari viku, sem ekki vakti ástarþrá í brjósti hennar, en hún bindur miklar vonir við annað stefnumót sitt í dag. Segist hún vilja sýna heiminum að jafnvel þó að hún sé 76 ára leggi hún ekki árar í bát, fólk verði að lifa lífinu og vera jákvætt.

Draumaprins Westheimer þarf að vera eldri en 65 ára og áhugaverður. Segir hún ísraelska karlmenn hafa góða kímnigáfu og njóta lífsins, en maðurinn þurfi hvorki að vera ríkur né algjör orkubolti.

• Blogga um frétt