Handtekinn asni verður sjónvarpsstjarna

Asninn Pacho hefur orðið sjónvarpsstjarna í Kólumbíu eftir að hann var handtekinn og settur í gæsluvarðhald í þrjá daga. Lögreglan réttlætti handtökuna með því að asninn væri aðili að umferðarslysi en ökumaður mótorhjóls lenti á honum á sunnudag og slasaðist við áreksturinn.

Mikil umræða hefur orðið í Kólumbíu um dýravernd vegna málsins. Slysið varð þegar Pacho var á leið heim ásamt Nelson Gonzalez, eiganda sínum. Asninn slasaðist á höfði og hægri hóf. Ökumaður mótorhjólsins slasaðist hins vegar meira og var fluttur á sjúkrahús.

Gonzalez fullyrti að asninn hefði ekki átt sök á slysinu. Hann heimsótti Pacho á lögreglustöðina á hverjum degi og kvartaði yfir því að hann fengi ekki nóg að borða. Pacho var látinn laus í gær þegar lögregla taldi að ekki þjónaði frekari tilgangi að hafa hann í haldi.

Gonzalez var hins vegar gert að greiða jafnvirði 500 króna vegna uppihalds asnans í fangelsinu.

• Blogga um frétt