Rappsöngkonan Missy Elliot vann ein helstu verðlaun myndbandahátíðar MTV sjónvarpsstöðvarinnar, sem fram fór í New York í Bandaríkjunum í 20. skipti í gærkvöldi. Elliot hlaut verðlaun fyrir myndband ársins fyrir lagið “Work it”. Þá fékk hún verðlaun fyrir besta Hip Hop myndbandið, en Elliot var tilefnd til átta verðlauna.
Þá unnu Justin Timberlake, Beyonce Knowles og breska hljómsveitin Coldplay til verðlauna, en hver um sig hlaut þrenn verðlaun. Timberlake fékk verðlaun fyrir besta poppmyndbandið, besta dansmyndbandið og besta myndbandið í flokki karlsöngvara. Coldplay fékk verðlaun fyrir “The Scientist” í flokki laga sem slógu í gegn, besta myndband með hljómsveit og bestu leikstjórn í flokki myndbanda. Beyonce vann verðlaun fyrir besta kvenmyndbandið, besta RandB-myndbandið og fyrir bestu sporin í “Crazy In Love”.
Í flokki nýliða hlaut 50 Cent verðlaun fyrir lagið “In Da Club”. Kántrý söngvarinn Johnny Cash, sem er 71 árs, var tilnefndur í átta flokkum og hlaut verðlaun í flokki kvikmyndagerðar fyrir myndbandið “Hurt”. Hann gat ekki tekið við verðlaununum vegna sjúkrahúsvistar.
Opnunaratriði hátíðarinnar vakti umtal en þar komu fram söngkonurnar Britney Spears, Christina Aguilera og Madonna. Söngkonurnar Britney og Madonna kystust blautum kossi í atriðinu, en þær þrjár sungu lagið “Like A Virgin”. Um er að ræða sama lagið og Madonna söng á MTV-hátíð fyrir 19 árum.