Madonna undirbýr nú tónleikaferð um heiminn og segja breskir fjölmiðlar að ferðin muni hefjast í Slane kastala á Írlandi. Þessi kastali, sem stendur á bakka árinnar Boyne, hefur verið vinsæll áfangastaður heimsfrægra poppstjarna en tónleikasvæðið þar rúmar um 100 þúsund áhorfendur.
Breska blaðið Daily Star on Sunday hefur eftir einum tónlistarmannanna í hljómsveit Madonnu, að æfingar séu þegar hafnar og tilkynnt hafi verið að leikið verði í Slane kastala.
Til þessa hefur mikil leynd hvílt yfir áformum Madonnu um tónleikaferð, en Daily Star hefur eftir heimildarmönnum að á tónleikunum ætli Madonna að flytja mörg af sínum þekktustu lögum og búningarnir verði byggðir á tísku síðustu aldar.
Madonna hefur ekki farið í tónleikaferð síðan árið 2001 þegar hún hélt 48 tónleika undir yfirskriftinni Drowned World. Hún hefur á síðustu árum einbeitt sér að uppeldi barna sinna, þeirra Lourdes og Rocco og en Madonna er gift leikstjóranum Guy Ritchie.