Þór/KA er komið aftur á topp Pepsi-deildar kvenna í knattspyrnu, að minnsta kosti tímabundið, eftir 5:0 sigur á Grindavík nú í kvöld.
Yfirburðir Íslandsmeistaranna voru miklir í fyrri hálfleik. Liðið óð í færum á meðan Grindavíkurliðið varðist eins og það gat. Það var þó ekki fyrr en á 44. mínútu að fyrsta markið leit dagsins ljós. Anna Rakel skoraði þá með skoti úr teignum, staðan 1:0 í hálfleik.
Í seinni hálfleik opnuðust flóðgáttir. Eftir þriggja mínútna leik í seinni hálfleik skoraði Sandra Jessen með skalla eftir hornspyrnu frá Láru Einarsdóttur. Lára var svo sjálf á ferðinni á 58. mínútu þegar hún skoraði af stuttu færi eftir að skalli frá Huldu Björg hafði verið varinn.
Sandra Jessen bætti svo við sínu öðru marki og fjórða marki Þórs/KA með skoti úr teignum eftir mistök Viviane í marki Grindavíkur. Stephany Mayor kom Þór/KA í 5:0 á 90. mínútu og þar við sat. Öruggur 5:0 sigur Þórs/KA staðreynd.
Sem fyrr segir er lið Þórs/KA komið á topp deildarinnar með 26 stig. Breiðablik getur þó farið aftur upp fyrir liðið með sigri á morgun. Grindavík er enn með 9 stig í 8. sæti deildarinnar.