Knattspyrnusamband Íslands hefur boðað til fréttamannafundar í höfuðstöðvum sínum í dag þar sem nýr þjálfari kvennalandsliðsins verður kynntur til leiks.
Jón Þór Hauksson, sem var aðstoðarþjálfari karlaliðs Stjörnunnar í sumar, verður þá að öllum líkindum opinberaður sem nýr landsliðsþjálfari en það hefur legið í loftinu undanfarna daga. Meiri dulúð ríkir hins vegar um hver verður aðstoðarþjálfari hans, eftir að Ásthildur Helgadóttir er sögð hafa hafnað stöðunni á dögunum.
Freyr Alexandersson lét af störfum sem landsliðsþjálfari kvenna í síðasta mánuði og tók við sem aðstoðarþjálfari karlalandsliðsins. Síðan þá hefur KSÍ leitað arftaka hans.